Вақт Ўзингсан қалбимга малҳам,
Хатоларим изин ёпгувчи.
Битган ярам чокин бир тилиб,
Хатойимга хато қўшгувчи.
Вақт ўзингсан олий бир ҳакам
Кимдан қандай ҳислат топгувчи
Дону дунни ғалвирдан элаб
Ҳасу чангдан фориғ этгувчи.
Вақт ўзингсан шифобахш зулук
Дард оғриғин сўриб олгувчи
Надоматда қолган вужуднинг
Юрагига қувонч солгувчи
Вақт ўзингсан тез оқар дарё
Лоқайдларни ҳалок этгувчи
Умр қайиғин измингга солиб
Манзилига олиб боргувчи.
